Жалпылай алғанда, дін адамзатты жақсылыққа, адамгершілікке жетелейтін, рухани байытатын жол. Ұлы ғұлама Абай хакімнің:

«Алланың өзі де рас, сөзі де рас,

Рас сөз ешқашан да жалған болмас...» дейтіні дін немесе Алланың елшісі Мұхам-мед (Алланың рахымы мен сәлемі болсын) пайғамбарымыз арқылы бізге жеткен Алланың сөзі – ислами қағидаттары шынайы тәрбие негізі екендігін көрсетіп тұрғандай.

Осындайда:

Шындықтан өткір қылыш жоқ,

Тас болса да кесетін.

Шындықпен жүрсең көңіл тоқ,

Шынайы тірлік кешесің, – дегім келеді.

Жоғарыда айтқандай әр діннің табынушылары өз ұлтының ерекшелігіне сай өз адами қасиеттерін қалыптастырады. Біз, қазақтар, мұсылманбыз, ислами қағидаттарды терең түсіну арқылы өз халқымызды, Отанымызды, әдет-ғұрпымыз салт-санамызды, ана тілімізді, ұлан-байтақ жерімізді сүюге, бір-бірімізді бауыр тұтуға, жақыным деп жақсы көруге үйренеміз және адалдық пен адамгершілікті, бірлік-берекені бағалай аламыз.

Бұл жайлы Ұлы Абай бабамыз:

Махаббатпен жаратқан адамзатты,

Сен де сүй ол Алланы жаннан тәтті.

Адамзаттың бәрін сүй бауырым деп,

Және хақ жолы осы деп әділетті, – деген өсиет қалдырды.

Жастарымыздың діни сауаттылығын бала жасынан қалыптастырып, қазақ халқының салт-дәстүр, әдет-ғұрпы, ырым-тыйымын насихаттау олардың түрлі экстремистік ағымдарға еліктемеуіне, рухани адаспауына септігін тигізеді. Сондықтан жастармен жұмыс жасайтын ұйымдар, балабақша, мектеп, жастар ұйымдары, орта және жоғары оқу орындарында дініміздің мән-мағынасын, оның шынайылығына, тән мен жан тазалығына, саулығына тигізетін пайдасын ұғындыру, дағдыландыру тәрбиенің басым бағыты болу шарт.

Бүркітбай ФАЙЗОЛЛАҰЛЫ, «Шарапат-Сауап» корпоративтік қорының төрағасы