Таулары асқақ Текелі,

Қыран құстардың мекені.

Самғайтын еркін көгімде,

Бұл – бабалардың мекені.

 

Таудың таза ауасы бар,

Дертке шипа, дауасы бар.

Текелідей көркем жердің,

Жұмақ сынды жобасы бар.

 

Сылдырап аққан Қорасы,

Көз тартар көркем жотасы.

Жоңғардың асқақ шыңдары –

Өлкемнің алтын ордасы.

 

Қарағай, шырша бүр жарған,

Бауыры толы гүл-арман.

Текелі – құтты мекенім,

Жаралған нұрдан, жырдан да.

 

Көшесі түзу, жап-жасыл,

Сырына қанық әр ғасыр.

Киелі менің мекенім –

Тарихтан шертер сан ғасыр.

 

Мейірбан халқы, елі бар,

Береке дарыған жері бар.

Мақтанышым – Текелім,

Айбары асқақ төрі бар.

 

Өзіңнен бақыт табамын,

Өзіңсің мақтан-жалауым.

Мәңгілік жайнай бергейсің,

Аяулы алтын тұрағым!

 

Әр сәт – бақыт

Әр сәт бақыт – естуім үндер жырын,

Толқынның да, жапырақ сыбдыр-сырын.

 

Әр сәт бақыт – тынысым, дем алғаным,

Өмір-өзен ағысын сезе алғаным.

 

Әр сәт бақыт – жанымның сезгені де,

Күн нұрының, самалдың ескені де.

 

Әр сәт бақыт – көзімнің көре алғаны,

Көкжиектен шуақтың таралғаны.

 

Әр сәт бақыт – адымдап жүре алуым,

Кең даламды, тауымды біле алуым.

 

Әр сәт бақыт – шынайы күлген күнім,

Шаттықпенен өмірді сүрген күнім.

Ақмарал Бекейқызы, 10-сынып оқушысы