Жас өскіннің жылы ұясы Көктемнің алғашқы шуағы сезілісімен-ақ жер бетіне көк қылтиып, тал-теректер бүр жарып, жеміс ағаштары гүлге оранады. Ал жылыжайда жыл мезгіліне қарамастан, гүл өсіп, өсімдік баптала береді. Текелідегі «Алма-Дария» шаруа қожалығының аумағы 1200 шаршы метр жылыжайында дәл қазіргі уақытта жұмыс қызып тұр.

Жылыжай жұмысы жанданып келеді Ғылым мен техника дамыған заманда жылыжай өніміне сұраныс еселеп артатыны анық. Бұл алдымен жергілікті тұрғындарды табиғи отандық өніммен қамтамасыз етсе, екіншіден, экологиялық таза өнімнің адам денсаулығына тигізер пайдасы мол. Осы орайда, Текелінің кіреберісінде 2015 жылы құрылған «Алма-Дария» шаруа қожалығы бүгінде жылыжай жұмысын жандандырып, гүл өсіру, жеміс ағаштары мен көкөністерді күтіп-баптауда. Интенсивті-инновациялық жаңалықтарға негізделген нысанда биыл алғаш рет 40 мың дана гүл жайқалып, 50 түп лимон ағашы бой көтеріп келеді. Осындай озық жобаның авторы, шаруа қожалық директоры, жаңашылдыққа жаны құмар азамат Олег Канды әңгімеге тарттық.