«Халық алғысы» медалі табысталды
Қазақстан Республикасының Президенті Қасым-Жомарт Кемелұлы Тоқаевтың 2020 жылғы 8 маусымдағы №348 Жарлығына сәйкес коронавирус індетімен күресте белсенділік танытқан текелілік азаматтар: «Шапағат» Текелі арнаулы әлеуметтік қызмет көрсету орталығының дәрігері Мәлікбаев Есенгелді Баймұхамбетұлы, «Жетісу шапағаты» қайырымдылық қорының Текелі қаласы бойынша жетекшісі Бахытақын Мергенбай, полиция лейтенанты Шалов Мирас Амангелдіұлы «Халық алғысы» медалімен марапатталды.
Марапат иелеріне медальді қала әкімі Батыр Қайыркенұлы табыстап, ізгі тілегін жеткізді.
Бұл марапат – бүкіл әлемде орын алып отырған дертпен күресте халық игілігіне қызмет етіп, қайсарлық пен мейірімділіктің нағыз үлгісін көрсеткен жандардың орасан еңбектері мен ерліктерін бағалау болып табылады. Қиын кезеңде көмек көрсетіп, халықпен тығыз жұмыс атқарып, аянбай еңбек етіп жатқан азаматтардың, ортақ жеңісі.
«Жақсының жақсылығын айт, нұры тасысын» дейді халқымыз. Сіздердің азаматтық істеріңізді дәріптеп, паш ету, көпке үлгі ету – біздің парызымыз.
Дендеріңізге саулық, отбасыларыңызға береке тілейміз. Істеріңіз табысты, жемісті болсын. Ел алғысын арқалап, қоғамға қалтқысыз қызмет ете беріңіздер.
