Өтіп бара жатқан жылдың ең бір сүбелі қадамдарының бірі Балалар жылы аясында қолға алынған істер екені рас. Балаларға көрсетілетін қамқорлық осы жылы еселей түсті. Әсіресе, көп балалы, аз қамтылған отбасылардан шыққан, жетім және ата-анасының қамқорлығынсыз қалған, мүмкіндігі шектеулі балаларға айырықша көңіл бөлінді. Мектепте ыстық тамақпен қамту, жазғы демалыстарын әсерлі ұйымдастыру, спортпен шұғылдануларына жағдай жасау сияқты қолдаулар жалғасын тапты. Желтоқсан айынан бастап Текелідегі мектеп оқушылары мен колледж студенттері қоғамдық көлікте тегін жүруге мүмкіндік алды.